ఒకప్పుడు ఆయన రాసిన సంభాషణలకు థియేటర్లు చప్పట్లతో మారుమోగేవి. ఆయన సినిమాల్లోని చిన్న చిన్న పాత్రలు సైతం ప్రేక్షకుల మనసుల్లో నిలిచిపోయేవి. కానీ ఇప్పుడు అదే త్రివిక్రమ్‌పై సోషల్ మీడియాలో ట్రోలింగ్ జరుగుతోంది.
రచయితగా మొదలై… మాటల మాంత్రికుడిగా మారి
తెలుగు సినిమా చరిత్రలో సంభాషణలతో ప్రత్యేకమైన గుర్తింపు తెచ్చుకున్న రచయితలు కొందరే. ఆ జాబితాలో త్రివిక్రమ్ శ్రీనివాస్‌కు ఒక ప్రత్యేక స్థానం ఉంది.
ఆకెళ్ల నాగ శ్రీనివాస శర్మ అలియాస్ త్రివిక్రమ్ శ్రీనివాస్ సినీ ప్రయాణం 1999లో ‘స్వయంవరం’తో రచయితగా మొదలైంది. ఆ తర్వాత ‘నువ్వే కావాలి’, ‘చిరునవ్వుతో’, ‘నువ్వు నాకు నచ్చావ్’ చిత్రాలతో తన పేరు మారుమ్రోగింది. ముఖ్యంగా ‘నువ్వు నాకు నచ్చావ్’లోని హాస్యం, భావోద్వేగం, సహజమైన సంభాషణలు త్రివిక్రమ్‌కు ప్రత్యేకమైన గుర్తింపును తీసుకొచ్చాయి.
‘మన్మథుడు’, ‘మల్లీశ్వరి’ చిత్రాలతో ఆయనలోని రచయిత మరింత చెలరేగిపోయాడు.
దర్శకుడిగానూ ప్రభంజనం
2002లో ‘నువ్వే నువ్వే’తో దర్శకుడిగా మారిన త్రివిక్రమ్,
2005లో మహేష్‌బాబుతో రూపొందించిన ‘అతడు’తో దర్శకుడిగా తన స్థానాన్ని స్థిరపరచుజున్నారు.
వాణిజ్య అంశాలు, భావోద్వేగాలు, కుటుంబ అనుబంధాలు, యాక్షన్, హాస్యం… వీటన్నింటినీ ఒకే కథలో సమన్వయం చేయగలిగిన దర్శకుడిగా గుర్తింపు తెచ్చుకున్నారు.
ఆ తర్వాత ‘జల్సా’, ‘ఖలేజా’, ‘జులాయి’, ‘అత్తారింటికి దారేది’ చిత్రాలు ఆయన దర్శక ప్రతిభకు మరిన్ని కోణాలను పరిచయం చేశాయి. ‘అ ఆ’, ‘అజ్ఞాతవాసి’, ‘అరవింద సమేత’, ‘అల వైకుంఠపురములో’ చిత్రాలతో తన ప్రభంజనాన్ని కొనసాగించారు.
త్రివిక్రమ్ అంటే కేవలం మాటలు కాదు!
త్రివిక్రమ్ సినిమాలను పరిశీలిస్తే ఒక విషయం స్పష్టమవుతుంది. ఆయన కథల్లో కుటుంబ సంబంధాలకు, మనుషుల మధ్య అనుబంధాలకు, ఆత్మగౌరవానికి, జీవితంలోని విలువలకు ప్రత్యేక స్థానం ఉంటుంది.
సాధారణమైన కుటుంబ కథనంలోనే ఆసక్తిని సృష్టించడం, చిన్న పాత్రలకు కూడా గుర్తుండిపోయే సంభాషణలు రాయడం ఆయన ప్రత్యేకత.
మహేష్‌బాబు, పవన్‌కల్యాణ్, అల్లు అర్జున్ వంటి స్టార్ హీరోలతో పనిచేసినప్పటికీ, వారి ఇమేజ్‌కు అనుగుణంగా కథనాన్ని మలచడంలో ఆయన విజయం సాధించారు.
ముఖ్యంగా వెంకటేష్‌తో ఆయనకున్న అనుబంధం గురించి ప్రత్యేకంగా చెప్పుకోవాలి. ‘నువ్వు నాకు నచ్చావ్’, ‘మల్లీశ్వరి’ చిత్రాల ద్వారా వెంకటేష్‌లోని సహజమైన హాస్యాన్ని, కుటుంబ ప్రేక్షకులకు చేరువయ్యే నటనను అద్భుతంగా ఆవిష్కరించారు.
అందుకే సుమారు 25 ఏళ్ల తర్వాత వెంకటేష్‌తో త్రివిక్రమ్ కలయిక కావడంతో ఈ చిత్రంపై భారీ అంచనాలు ఏర్పడ్డాయి. అందుకు తగ్గట్టుగానే ప్రచార కార్యక్రమాలు కూడా ఆసక్తిని పెంచాయి.
కానీ సినిమా విడుదలకు ముందే ‘మాలా’ పాటపై వచ్చిన విమర్శలు, సంగీతంలోని పునరావృత ధోరణిపై చర్చలు చిత్రానికి ప్రతికూల వాతావరణాన్ని సృష్టించాయి.
విడుదల తర్వాత కథలో కొత్తదనం, ద్వితీయార్ధంలోని కథనం, కామెడీ నుంచి యాక్షన్ థ్రిల్లర్ వైపు జరిగిన మార్పు, భావోద్వేగాల బలహీనత వంటి అంశాలపై విమర్శలు వచ్చాయి.
ముఖ్యంగా తొలి భాగంలో కనిపించిన త్రివిక్రమ్ మార్క్ కుటుంబ హాస్యం, ద్వితీయార్ధంలో అదే స్థాయిలో కొనసాగలేదన్న అభిప్రాయం పలువురి సమీక్షల్లో కనిపించింది.
వెంకటేష్ నటనకు ప్రశంసలు లభించినప్పటికీ, కథనం విషయంలో దర్శకుడిపై ప్రశ్నలు తలెత్తాయి.
ఇక సోషల్ మీడియాలో ట్రోలింగ్ విషయానికి వస్తే… సినిమా నచ్చకపోతే విమర్శించే హక్కు ప్రేక్షకులకు ఉంది. కానీ ఒక సినిమా ఫలితాన్ని ఆధారంగా చేసుకుని ఒక దర్శకుడి మొత్తం ప్రతిభను కొట్టిపారేయడం మాత్రం సరైన విశ్లేషణ అనిపించుకోదు.
అదే సమయంలో విమర్శలన్నింటినీ పనిగట్టుకుని చేస్తున్న ట్రోలింగ్‌గా కొట్టిపారేయడం కూడా సమంజసం కాదు.
ప్రేక్షకుల నుంచి వచ్చిన నిర్మాణాత్మక విమర్శలను స్వీకరించాల్సిన బాధ్యత ఒక సృజనాత్మక దర్శకుడికి ఉంటుంది.
త్రివిక్రమ్ ముందున్న
అసలైన సవాలు!
త్రివిక్రమ్‌కు ఇప్పుడు అవసరమైనది మరో భారీ విజయం మాత్రమే కాదు. తనను తాను కొత్తగా ఆవిష్కరించుకోవడం.
ఒకప్పుడు తనను ప్రత్యేకంగా నిలబెట్టిన సంభాషణల శైలికి కొత్తదనాన్ని జోడించాలి. కథల ఎంపికలోనూ, పాత్రల రూపకల్పనలోనూ, కథనం నడిపించే విధానంలోనూ ప్రయోగాలకు సిద్ధపడాలి.
స్టార్ హీరోల ఇమేజ్‌ను దృష్టిలో పెట్టుకుని కథను నిర్మించడం కంటే, కథలోని పాత్రలకు అనుగుణంగా హీరోలను నడిపించే ప్రయత్నం చేయాలి.
త్రివిక్రమ్‌లోని రచయిత ఇప్పటికీ ప్రేక్షకులకు కావాలి. ఆయనలోని దర్శకుడు కూడా అంతే స్థాయిలో కొత్త అనుభూతిని అందించాలి.
ఒక్క సినిమా… ఒక సుదీర్ఘ ప్రయాణానికి కొలమానం కాదు!
తెలుగు సినిమా పరిశ్రమలో రచయితగా మొదలై, స్టార్ దర్శకుడిగా ఎదిగిన త్రివిక్రమ్ ప్రయాణం సాధారణమైనది కాదు.
ఆయన సృష్టించిన పాత్రలు, సంభాషణలు, సినిమాలు తెలుగు ప్రేక్షకుల జ్ఞాపకాల్లో చిరస్థాయిగా నిలిచిపోయాయి. అదే సమయంలో ఆయన సినిమాలపై వస్తున్న విమర్శలను కూడా విస్మరించలేం.
ప్రస్తుతం ‘ఆదర్శ కుటుంబం’ చుట్టూ జరుగుతున్న ట్రోలింగ్ ఆయన కెరీర్‌లో మరో చర్చనీయాంశంగా మిగిలిపోవచ్చు.
కానీ ఇక్కడ త్రివిక్రమ్‌కు తేలాల్సిన పరీక్ష ఒక్కటే.
తన పాత విజయాలను గుర్తుచేసుకుంటూ కాలం గడపడం కాదు… తన పాత విజయాలను మరిపించే కొత్త సినిమాను అందించడం!
ఎందుకంటే ప్రేక్షకులు త్రివిక్రమ్‌ను తిరస్కరించాలనుకోవడం లేదు. ఒకప్పుడు ఆయన ఇచ్చిన అద్భుతమైన సినిమా అనుభూతిని మరోసారి పొందాలనుకుంటున్నారు.
అందుకే ఇది మాటల మాంత్రికుడి పతనం గురించి కాదు… తనలోని మాంత్రికుడిని మరోసారి నిరూపించుకోవాల్సిన సమయం గురించి!
