కన్నడ చిత్ర పరిశ్రమలో ఘనవిజయం సాధించిన ‘రాక్షసపుర’ చిత్రాన్ని ప్రముఖ నిర్మాణ సంస్థ క్రియేటివ్ కమర్షియల్స్ అధినేత కె.ఎస్. రామారావు తెలుగు ప్రేక్షకులకు అందిస్తున్నారు. డాక్టర్ రవి దర్శకత్వంలో రాజ్ బి శెట్టి హీరోగా రూపొందిన ఈ చిత్రాన్ని తెలుగులో ‘రాక్షసపురం’ పేరుతో మే 1న విడుదల చేయనున్నట్లు ఆయన అధికారికంగా ప్రకటించారు.
ఈ సందర్భంగా జరిగిన ప్రెస్ మీట్లో ఆయన సినిమా విశేషాలు పంచుకున్నారు. ‘‘ఇది ఒక అద్భుతమైన మర్డర్ మిస్టరీ థ్రిల్లర్. కన్నడ వెర్షన్ చూసిన తర్వాత సినిమాలోని మేకింగ్, ప్రొడక్షన్ వాల్యూస్, సస్పెన్స్ ఎలిమెంట్స్ నన్ను ఎంతగానో ఆకట్టుకున్నాయి. అందుకే తెలుగు ప్రేక్షకులకు అందించాలని నిర్ణయించుకున్నా. సినిమాలో రాజ్ బి శెట్టి ఇన్ స్పెక్టర్ పాత్రలో అద్భుతంగా నటించారు.’’ అని తెలిపారు.
మే డే హాలిడే: కార్మికుల దినోత్సవం (మే 1) సెలవు కావడం వల్ల ప్రేక్షకులకు అందుబాటులో ఉంటుందని ఈ తేదీని ఎంచుకున్నట్లు కె.ఎస్. రామారావు తెలిపారు. ప్రస్తుతం ఐపీఎల్ సందడి ఎక్కువగా ఉన్నందున, వీలైనంత వరకు మార్నింగ్, మ్యాట్నీ షోలకు ప్రాధాన్యత ఇస్తూ సినిమాను ప్రదర్శించాలని డిస్ట్రిబ్యూటర్లను కోరుతున్నట్లు తెలిపారు. త్వరలోనే సినిమా ట్రైలర్ రిలీజ్ చేస్తామని చెప్పారు.
ప్రస్తుతం సినిమా ఇండస్ట్రీ కష్టకాలంలో ఉందని, ఐపీఎల్ ప్రభావం, ఓటీటీల పోటీ వల్ల థియేటర్లకు ప్రేక్షకులు రావడం తగ్గుతోందని ఆయన ఆవేదన వ్యక్తం చేశారు. అయినప్పటికీ, ‘రాక్షసపురం’ లాంటి మంచి కంటెంట్ ఉన్న సినిమాలు ప్రేక్షకులను కచ్చితంగా థియేటర్లకు రప్పిస్తాయనే నమ్మకాన్ని వ్యక్తం చేశారు.
ఈ కార్యక్రమంలో మరో ప్రముఖ నిర్మాత తుమ్మల రామసత్యనారాయణ కూడా పాల్గొన్నారు. కేఎస్ రామారావు గారి టేస్ట్, అనుభవం ఈ సినిమా విజయానికి తోడ్పడుతుందని ఆయన ఆకాంక్షించారు.
అన్ని కార్యక్రమాలు పూర్తి చేసుకున్న ‘రాక్షసపురం’ మే 1న గ్రాండ్గా థియేటర్లలో విడుదల కానుంది.
