భారతీయ ఇతిహాసాల్లో రామాయణానికి ఉన్న ప్రత్యేకతే వేరు. తరతరాలుగా ప్రజల మనసుల్లో పాతుకుపోయిన ఈ మహాకావ్యాన్ని వెండితెరపై ఆవిష్కరించడం ఎంతటి సాహసమో, అంతకంటే పెద్ద బాధ్యత కూడా! గతంలో ప్రభాస్ కథానాయకుడిగా వచ్చిన ‘ఆదిపురుష్’ భారీ అంచనాల మధ్య విడుదలై, ప్రేక్షకుల తీవ్ర విమర్శలను ఎదుర్కొంది. అత్యాధునిక సాంకేతికత, భారీ బడ్జెట్, స్టార్ ఇమేజ్ ఉన్నంత మాత్రాన ఇతిహాసాన్ని విజయవంతంగా తెరకెక్కించలేమని ఆ సినిమా నిరూపించింది.
ఇప్పుడు అదే రామాయణ గాథను మరోసారి అత్యంత భారీ స్థాయిలో ఆవిష్కరించే ప్రయత్నం చేశారు దర్శకుడు నితీష్ తివారీ. ‘దంగల్’ వంటి విజయవంతమైన చిత్రాన్ని అందించిన ఆయన దర్శకత్వంలో తెరకెక్కిన ఈ సినిమాలో రాముడిగా రణబీర్ కపూర్, సీతగా సాయిపల్లవి, రావణుడిగా యశ్ నటించారు.
అయితే రణబీర్ ముందున్న సవాలు సాధారణమైనది కాదు. రాముడి పాత్రలో కనిపించడం ఒక ఎత్తయితే, ప్రేక్షకుల మనసుల్లో ఉన్న రాముడి ప్రతిరూపానికి తెరపై ప్రాణం పోయడం మరో ఎత్తు. ఆ పాత్రలోని ఔన్నత్యం, సంయమనం, ధర్మనిష్ఠ, భావోద్వేగాలను ఎంత సహజంగా ఆవిష్కరిస్తారన్నదే కీలకం.
‘ఆదిపురుష్’లో ఎదురైన ప్రధాన విమర్శలు విజువల్ ఎఫెక్ట్స్, సంభాషణలు. ఆ అనుభవం నుంచి ‘రామాయణం’ రూపకర్తలు ఎంతవరకు పాఠాలు నేర్చుకున్నారన్నది ఆసక్తికరం. కేవలం గ్రాఫిక్స్‌తో అద్భుతాలు సృష్టించడం కాకుండా, కథలోని భావోద్వేగాలను ప్రేక్షకులకు చేరువ చేయగలిగితేనే ఈ ప్రయత్నానికి సార్థకత లభిస్తుంది.
ప్రభాస్‌కు సాధ్యం కాని విజయాన్ని రణబీర్ సాధిస్తాడా? అని అందరూ ఆసక్తిగా ఎదురు చూస్తున్నారు!!
